На 18 јуни, со почеток во 20 часот, во Public Room ќе се одржи концертот „Lullaby for Lunatics“, првиот самостоен проект со авторска музика на контрабасистката, композиторка и мултиинструменталистка Андреа Мирческа.

Станува збор за концерт што носи музичко патување инспирирано од богатите бразилски звуци од периодот на Тропикалија, движење кое во шеесеттите години ги спои традицијата, психоделијата, авангардата и експериментот во еден препознатлив, слободоумен и храбар музички израз.

Во „Lullaby for Lunatics“, Мирческа го поставува контрабасот во центарот на звучната приказна. Преку него, таа создава композиции што се движат помеѓу џезот, импровизацијата, современата музика и експерименталните форми.

Публиката ќе има можност да доживее концерт во кој инструментите не се само придружба, туку меѓусебно комуницираат, создавајќи атмосфери, звучни пејзажи и емоционални светови во кои ноќта дише во сопствен ритам.

На сцената ќе настапи Андреа Мирческа квинтет во состав: Андреа Мирческа – контрабас, клавијатури и вокал, Драган Теодосиев – тапани, Филип Букршлиев – гитара, Благојче Томевски – кларинет и бас кларинет и Нинослав Спировски – тенор и сопран саксофон.

Концертот претставува можност за средба со нов авторски глас на домашната музичка сцена, но и со музичари кои преку колективна импровизација, современ израз и отворен пристап кон звукот ги поместуваат границите на жанровите.

Визуелниот идентитет на проектот е дело на Љубен Трајаноски.