Пожарот што на 17 јуни уништи голем складиштен ладилник во населбата Бојл Хајтс во Лос Анџелес зад себе остави околу 39 милиони килограми храна што скапува на високите температури. Речиси два месеци подоцна, локалното население се соочува со неподнослива смрдеа, роеви муви и наезда од штетници. Чистењето на локацијата се одвива бавно, што предизвика револт кај граѓаните и реакција од градските власти.
Големото количество месо, живина и морски плодови што останаа под урнатините на складиштето почнаа интензивно да се распаѓаат, а мирисот се прошири низ целата индустриска зона и околните станбени куќи. Локалните сопственици на мали бизниси пријавуваат драстичен пад на прометот бидејќи купувачите го избегнуваат регионот.
Покрај мирисот, локацијата ја зафати и голема наезда од инсекти. Извештајот од инспекциските служби предупредува дека брзото размножување на мувите во отпадот претставува ризик од пренос на болести, посебно кај луѓе и животни со отворени рани. Жителите дополнително пријавуваат присуство на големи глодари за кои поставените запки на тротоарите се покажаа неефикасни.
The Boyle Heights warehouse fire is sparking a disgusting new dilemma. Hordes of rats are now licking their chops at the 85 million pounds of rotting food left over in the warehouse. The pesky new problem for clean-up crews – Tonight at 11 from ABC7. https://t.co/KyYPW4mNOa pic.twitter.com/XacrHFs9FE
— ABC7 Eyewitness News (@ABC7) June 26, 2026
Поради бавната реакција и нарушените хигиенски услови, окружниот оддел за јавно здравје ја казни компанијата „Линиџ“ (Lineage), која стопанисуваше со складиштето, со 500 долари дневно. Градоначалничката Карен Бас упати и писмо до акционерите на компанијата, критикувајќи ги за недоволната транспарентност и одложената комуникација со јавноста.
Градските служби издадоа наредба со која се запираат сите планови за евентуална реконструкција на објектот сè додека не се заврши комплетната санација и не се заштити здравјето на граѓаните. За поддршка на заедницата беа ангажирани мобилни здравствени клиники и беа поделени илјадници прочистувачи на воздух.
Од компанијата „Линиџ“ соопштија дека нивните екипи работеле непрекинато и дека досега е отстранет околу 80 проценти од отпадот, што е напредок во однос на 60-те проценти исчистени на крајот на јули. Претставниците на компанијата наведуваат дека станува збор за исклучително сложена операција која вклучува расчистување на урнатините и демонтирање на оштетената челична конструкција.
Вкупните трошоци за целосно расчистување на локацијата и неутрализација на мирисите се проценуваат на износ меѓу 80 и 100 милиони долари, додека целосната завршница на примарното отстранување на храната се очекува во текот на следната недела.
