Поставувањето камен-темелник за новиот маркет на „Лидл“ во Струмица означува почеток на голем инвестициски проект, кој, според вицепремиерот и министер за транспорт Александар Николоски, ќе има значајно влијание врз економијата на регионот и државата.

Николоски истакна дека станува збор за трансформациски проект кој ќе го промени изгледот на просторот и ќе придонесе за подобрување на деловната клима во земјата.

Според него, доаѓањето на еден од најголемите трговски брендови во Европа, „Лидл“, претставува важен чекор за позиционирање на Македонија на економската мапа и за привлекување нови инвестиции.

Инвестиција од околу 200 милиони евра

Николоски нагласи дека вкупните инвестиции поврзани со проектот во државата се проценуваат на околу 200 милиони евра, што, како што рече, претставува значаен капитал за македонската економија.

Тој додаде дека Владата останува посветена на привлекување и поддршка на секоја инвестиција која носи нови работни места и економски раст.

Нови можности за земјоделците од Струмичкиот Регион

Во своето обраќање, Николоски посочи дека новиот објект ќе придонесе за развој на целиот Струмички Регион, особено во делот на земјоделското производство.

Според него, локалните производители ќе добијат нови можности за пласман, не само на домашниот, туку и на странските пазари преку мрежата на „Лидл“.

„Струмичкиот Регион е земјоделско срце на Македонија и токму тука се создаваат производи со висок квалитет кои заслужуваат поширок пласман“, порача Николоски, изразувајќи очекување дека дел од локалното производство ќе заврши на полиците на „Лидл“ низ Европа.

Тој додаде дека во наредниот период ќе продолжат реформите за олеснување на процедурите за инвестиции, вклучително и измени во урбанистичкото планирање, со цел вакви проекти побрзо да се реализираат.

Според најавите, првите маркети „Лидл“ во Македонија би можеле да бидат отворени околу крајот на годината, со што земјата ќе стане дел од мрежата на еден од најголемите европски малопродажни синџири.