Хартиените свидетелства заминуваат во историјата, а училиштата постепено влегуваат во нова дигитална ера. Министерството за образование и наука (МОН) годинава започнува со воведување дигитални свидетелства за учениците од прво до трето одделение, додека од следната учебна година системот треба целосно да премине на електронско издавање на документите.
Министерката за образование и наука, Весна Јаневска, информираше дека процесот ќе се реализира постепено за училиштата и наставниците полесно да се приспособат на новиот начин на работа.
„Како Министерство обезбедивме електронски печати и електронски потписи, а оваа година воведовме хибриден модел за да не се случи некое училиште да остане без можност да издаде свидетелства. Од следната година тие ќе бидат целосно дигитални“, изјави Јаневска.
Според најавите, учениците од прво до трето одделение ќе бидат првата генерација што ќе добие дигитални свидетелства, а во следната фаза системот ќе се прошири и на учениците од четврто до шесто одделение.
Министерката посочи дека годинава се применува комбиниран модел бидејќи не сите наставници се подеднакво подготвени за целосно дигитална работа. Во изминатиот период биле обучени речиси 20.000 наставници за користење дигитални алатки и за справување со процесите на дигитализација.
„Постојат различни нивоа на подготвеност кај наставниот кадар, а возраста и другите околности влијаат врз способноста за брзо приспособување кон целосно дигитална средина“, истакна Јаневска.
МОН веќе обезбедило електронски печати и електронски потписи, што претставува основен предуслов документите да имаат законска важност во електронска форма. Тоа значи дека свидетелствата ќе можат да се издаваат и заверуваат дигитално, без потреба од задолжителен хартиен документ.
Дигитализацијата е дел од поширокиот процес на модернизација на образовниот систем, чија цел е намалување на администрацијата, поедноставување на работата на училиштата и овозможување побрз и побезбеден пристап до образовните документи.
Сепак, процесот отвора и повеќе прашања поврзани со техничката подготвеност на училиштата, заштитата на личните податоци и функционирањето на системот во руралните средини каде што дигиталната инфраструктура е послабо развиена.
Токму поради тоа, МОН годинава се одлучи за хибриден модел, со цел ниту еден ученик да не остане без свидетелство поради технички или организациски проблеми.
На крајот од учебната година, Јаневска им го честиташе успехот на учениците и наставниците, оценувајќи дека оваа учебна година донела подобри резултати во споредба со претходната.
Со најавената целосна дигитализација од следната година, електронските документи треба да станат стандард во образованието, а хартиените свидетелства постепено да останат дел од минатото.
