Германскиот производител BMW официјално ја заврши производството на својот легендарен Z4 roadster, со што става крај на речиси три децении долга историја на Z-серијата спортски модели. Последниот примерок слезе од производната линија во погоните на Magna Steyr во Австрија, означувајќи го финалето на актуелната генерација која започна во 2018 година.

Симбол на возачка страст

BMW Z4 беше повеќе од спортски автомобил, тој претставуваше симбол на чисто возачко задоволство, отворени патишта и класичен roadster дух. Неговото повлекување означува значаен пресврт во стратегијата на компанијата, која се насочува кон електрификација и SUV сегментот.

Кон крајот на минатата година, BMW ја претстави специјалната „Final Edition“ серија како најава за крајот на моделот. Ова издание донесе ексклузивни дизајнерски детали, како и ретка опција за шестстепен мануелен менувач кај M40i верзијата, што предизвика голем интерес кај ентузијастите.

Иако продажбата бележеше раст во почетокот на 2026 година, тоа не беше доволно за оправдување на развој на нова генерација.

Соработка со Toyota и крај на платформата

Z4 беше развиен во соработка со Toyota, која на истата платформа ја создаде GR Supra. Со завршувањето на производството на Supra во март, практично беше запечатена и судбината на Z4. BMW засега нема планови за наследник на Z-серијата, што дополнително го потврдува крајот на ова поглавје.

Компанијата сега останува со ограничена понуда на кабриолети, додека се фокусира на електрични модели и попрофитабилни SUV сегменти. Овој потег се вклопува во пошироката индустриска трансформација кон електрификација и намалување на производни линии за нискообемни спортски автомобили. За љубителите на класичните roadster модели, последните Z4 примероци веќе стануваат колекционерски реткости со растечка вредност.