OpenAI, компанијата зад ChatGPT, подготвува најголема трансформација на својот популарен четбот досега, со цел да го претвори во целосна „супер-апликација“ што оди многу подалеку од класичното разговорно користење.

Според најавите и информации од „Financial Times“, компанијата OpenAI планира ChatGPT да го претвори во платформа базирана на таканаречени AI агенти, системи кои нема само да одговараат на прашања, туку и самостојно ќе извршуваат задачи како планирање патувања, организирање состаноци, пишување софтвер и управување со дигитални активности.

Внатре во компанијата, дел од раководството дури ја опишува новата насока со порака дека „чатот е мртов“, нагласувајќи дека иднината не е во разговори, туку во активни дигитални асистенти што работат во име на корисникот. Во новиот модел, поголем фокус ќе добие и Codex – алатка за генерирање и пишување код, додека ChatGPT ќе стане влезна точка кон поширок екосистем на алатки, апликации и услуги.

Промените се дел од стратегијата на OpenAI да го засили растот пред потенцијален излез на берза (IPO), при што компанијата сè повеќе се насочува кон бизнис-корисници и профитабилни решенија. Новата верзија на ChatGPT ќе вклучува и интеграции со апликации од трети страни, како алатки за дизајн, резервации и продуктивност, со цел корисникот да добие „еден дигитален асистент за сè“.

Со ова, OpenAI најавува крај на класичниот концепт на четбот и почеток на нова ера на автономни AI системи кои ќе делуваат како лични дигитални асистенти во секојдневниот живот.