Британската принцеза од Велс, Кејт Мидлтон, не ги поканила својот девер, принцот Хари, ниту неговата сопруга Меган Маркл на традиционалниот концерт на божиќни песни што го организира, пренесува „Дејли мејл“. Војводата и војвотката од Сасекс се изоставени од списокот на гости за божиќниот концерт „Заедно во Божиќ“, кој ќе се одржи на 11 декември во Вестминстерската опатија.

На настанот се очекува да присуствуваат повеќе од 1.600 гости. Токму во оваа опатија принцот Вилијам и принцезата Кејт се венчаа во 2011 година. На концертот вообичаено се покануваат членови на поширокото кралско семејство, познати личности и луѓе кои придонесуваат за своите локални заедници. Изоставувањето на принцот Хари, братот на Вилијам со кого е во заладени односи, и Меган Маркл е особено забележливо со оглед на темата на годинашната церемонија – „љубов, добрина и меѓусебна грижа“.

Хари (42) и Меган (45) се вратија во Велика Британија во август, по шест години поминати во Калифорнија.

Божиќниот концерт стана еден од препознатливите настани што ги организира Кејт Мидлтон. Кралот Чарлс Трети и кралицата Камила ретко присуствуваат на оваа церемонија. Минатата година на концертот беа присутни принцот Вилијам и нивните три деца – принцот Џорџ, принцезата Шарлот и принцот Луј. Меѓу останатите гости беа и Софи, војвотката од Единбург, Зара и Мајк Тиндал, како и принцот Мајкл од Кент.