Додека трае еуфоријата за Светското првенство, медицинските експерти предупредуваат дека огромната тензија при фудбалските натпревари може да има сериозни последици врз здравјето. Научно е докажано дека гледањето натпревари со висок интензитет го зголемува ризикот од срцеви удари, аритмии и други кардиоваскуларни проблеми кај луѓето кои веќе имаат хронични заболувања или други фактори на ризик.
Ова не е само теорија. Позната студија објавена по Светското првенство во Германија покажа дека итните кардиоваскуларни случаи се зголемиле за дури 2.7 пати за време на натпреварите на домашната репрезентација. Две децении подоцна, најновите истражувања објавени во научниот весник Scientific Reports повторно потврдуваат дека врвниот фудбал предизвикува нагол скок на срцевиот ритам и екстремно ниво на стрес, дури и кај оние кои натпреварот го гледаат опуштени на софата.
Според шпанскиот кардиолог Хосе Абелјан, човечкото тело реагира на фудбалско финале на речиси идентичен начин како кога се наоѓа во реална опасна ситуација. Тогаш доаѓа до нагло лачење на хормоните на стрес – кортизол и катехоламини. Овој хормонален налет го зголемува крвниот притисок, ја забрзува работата на срцето и го поттикнува згрутчувањето на крвта, што може да биде фатален тригер доколку срцето веќе е ослабено.
Најголем ризик постои кај лицата кои веќе преживеале инфаркт, имаат вградено стентови, страдаат од хипертензија, дијабетес, висок холестерол или имаат историја на аритмии. Докторот предупредува дека дополнителен проблем е и однесувањето околу натпреварите. Прејадувањето со калорична храна, пушењето и прекумерното конзумирање алкохол можат да доведат до таканаречениот „синдром на празнично срце“ (Holiday Heart Syndrome), односно сериозно нарушување на срцевиот ритам по пиење.
Поради тоа, кардиолозите апелираат веднаш да се побара лекарска помош доколку се појават три клучни симптоми: силна болка и чувство на тежина во градите која се шири кон рамената, вратот или грбот проследена со потење, ненадеен недостиг на воздух или палпитации (забрзано чукање на срцето) кои не престануваат ниту откако возбудата ќе помине.
