Летните горештини не создаваат проблеми само на улиците, туку и зад воланот. Автомобил оставен на сонце може за кратко време да се претвори во вистинска печка, а температурата во кабината да достигне ниво што го прави возењето непријатно и потенцијално опасно. Автомобилските експерти советуваат дека најбрзиот начин за ладење на возилото е комбинација од проветрување и правилна употреба на клима-уредот.

Пред да ја вклучите климата, отворете ги сите врати и прозорци на една до две минути за да се исфрли насобраниот жежок воздух од кабината. На овој начин климатизацијата нема да мора да работи под максимално оптоварување веднаш по тргнувањето.

Откако ќе започнете со возење, затворете ги прозорците и вклучете ја климата во режим на рециркулација. Оваа функција овозможува системот да го лади воздухот што веќе се наоѓа во автомобилот, наместо постојано да внесува жежок воздух однадвор, што значително го забрзува разладувањето.

Експертите препорачуваат и насочување на ладниот воздух кон патниците за порамномерно ладење на кабината. Кај возилата што имаат задни отвори за вентилација, нивното користење дополнително ја подобрува циркулацијата на воздухот. Доколку автомобилот има покривен отвор, неговото краткотрајно отворање за време на возењето може да помогне топлиот воздух побрзо да излезе од внатрешноста.

Според стручњаците, токму комбинацијата од почетно проветрување и правилно користење на климатизацијата е најефикасниот начин за брзо намалување на температурата во возилото, што придонесува за побезбедно и поудобно возење во летните денови. Дополнително, се препорачува никогаш да не се оставаат деца, постари лица или домашни миленици во паркиран автомобил, дури ни на краток период, бидејќи температурата во кабината може опасно брзо да се зголеми