Производител на кујнски апарати и пиварница здружиле сили за необичен производ: пиво направено со ориз што останува при тестирањето апарати за готвење. Јапонската компанија „Зоџируши“ го претставила „Зо но маи“, познато како „Танц на слоновите“, со идеја да искористи храна што инаку би завршила како отпад.

Пивото е развиено во соработка со „Ечиго бир“, а продажбата во Јапонија почнала на 10 март годинава. Станува збор за златен ејл со 4,5 проценти алкохол, достапен во лименки од 350 милилитри.

Според производителот, има помала горчина и лесен, освежителен вкус. Оризот што се користи е остаток од пробните готвења во развојот на апаратите, а не храна собрана од отпад.

Како што пренесува агенцијата Кјодо, при овие тестирања годишно остануваат околу 30 тони ориз. Најголемиот дел се преработува во компост, а за производство на пивото засега може да се искористат околу пет проценти од таа количина.

Компанијата бара и други начини да ги употреби остатоците. Во рамките на иницијативата „Рајс лаб“ развива производи што го претвораат сварениот ориз во нови суровини, меѓу нив ферментиран засладувач и етанол за влажни марамчиња.