Словенскиот парламент ја одобри новата влада на десниот центар предводена од премиерот Јанез Јанша, со што официјално започнува неговиот четврти мандат. Новата влада најавува намалување на даноците, рационализација на јавната потрошувачка и засилена борба против корупцијата, а аналитичарите очекуваат и промени во надворешната политика.

Јанша, кој по изборите во март обезбеди нов мандат, во парламентот изјави дека неговиот кабинет ќе ја претставува целата земја и ќе вклучува министри од различни генерации и региони. Претходно, Словенија ја водеше либералната влада на Роберт Голоб, која освои тесна изборна победа, но не успеа да формира стабилно мнозинство.

Владата е изгласана со 49 гласа „за“ и 30 „против“ и има 15 членови, при што поголемиот дел од министрите доаѓаат од партијата СДС, а останатите од коалициските партнери НСи, Демократи и Фокус, со дополнителна поддршка од десничарската партија Ресница.

Јанша најави намалување на даноците и бирократијата, борба против корупцијата и поголеми овластувања за локалната самоуправа, додека опозицијата предупредува на можен раст на дефицитот и приватизација на здравството. Ова е негов четврти премиерски мандат, по претходните во периодите 2004–2008, 2012–2013 и 2020–2022 година.