Маалски Фестивал 5.0 ќе ја заокружи својата јубилејна програма со концерт на бендот ИСКРА, кој ќе се одржи во сабота во 22:00 часот во Паркот на Франкофонија во Скопје.
ИСКРА, едно од најпрепознатливите имиња на домашната алтернативна сцена, ќе ја затвори фестивалската вечер со својот карактеристичен звук кој спојува synthwave, електронска музика, метал и силни визуелни елементи. Бендот е основан во Скопје во 2019 година и гради уникатен музички израз инспириран од футуристички и носталгични звучни пејзажи.
Со повеќе настапи на домашни и регионални фестивали и три објавени изданија, ИСКРА се етаблира како проект што ја поместува границата меѓу музика, приказна и визуелна уметност.
Концертот во Паркот на Франкофонија ќе биде финалниот настан од петтото издание на Маалски Фестивал, кое се одржува на 11, 12 и 13 јуни на неколку локации, вклучувајќи го КСП Центар – Јадро. Фестивалот е посветен на заедницата, уметноста и поврзувањето на различни генерации преку културни содржини.
