Најмалку три ирански танкери, кои превезувале речиси пет милиони барели сурова нафта, го напуштиле подрачјето на блокада во Ормускиот теснец. Ова е прв ваков случај од почетокот на конфликтот меѓу САД и Иран пред околу два месеца. Според податоци на компанијата „Кплер“, два супертанкери под американски санкции – „Диона“ и „Херо 2“ – превезле вкупно околу 3,8 милиони барели иранска нафта, додека трет танкер поврзан со Иран транспортирал уште околу еден милион барели.
Аналитичарите сметаат дека ова може да биде прв сигнал за постепено нормализирање на поморскиот сообраќај, по информациите дека САД и Иран постигнале меморандум за разбирање со кој би требало да заврши речиси четиримесечниот конфликт. Се очекува официјалното потпишување на договорот да се случи во петок во Женева.
Иако деталите од договорот сè уште не се објавени, се очекува можно ублажување на американските санкции и повторно отворање на Ормускиот теснец за трговија со нафта. Според дел од медиумите, Вашингтон би можел да дозволи ограничена продажба на иранска нафта во замена за ограничување на нуклеарната програма на Техеран.
Ормускиот теснец, кој пред конфликтот беше една од најважните светски поморски рути со околу една петина од глобалната трговија со нафта, во последните месеци беше речиси блокиран поради безбедносните мерки и зголемените тензии. Иако дел од бродските компании веќе почнуваат да ги преместуваат танкерите кон Персискиот Залив, индустријата сè уште останува претпазлива. Осигурителните премии за воен ризик се високи, а компаниите чекаат јасни гаранции за долгорочна безбедност на пловидбата.
Според проценките, повеќе од сто танкери би можеле да го напуштат регионот во рок од 15 дена по евентуалното официјално потпишување на договорот, но засега сообраќајот низ Ормускиот теснец останува ограничен и внимателно контролиран.
