Индискиот извоз на ориз бележи благ пад во првите четири месеци од годинава, главно поради нарушувањата во испораките на премиум сортата басмати кон регионот на Персискиот Залив, изјавиле двајца владини претставници.
Индија е убедливо најголемиот извозник на ориз во светот и испорачува повеќе од оваа житарка отколку Тајланд, Виетнам и Пакистан заедно, кои се следни на глобалната листа.
Во периодот од јануари до април, индискиот извоз се намалил за 1,3 проценти во споредба со истиот период лани и изнесувал 8,39 милиони тони, навеле претставниците кои побарале да останат анонимни бидејќи не биле овластени да зборуваат за медиуми.
Извозот на басмати ориз паднал за седум проценти, на 2,3 милиони тони, што се поврзува со намалените испораки на пазари како Иран. Испораките на другите видови ориз, пак, благо пораснале — од 6,03 милиони на 6,09 милиони тони.
Според извозник од Њу Делхи, извозот веројатно ќе остане под вообичаеното ниво сè додека трае војната во Иран.
Поради конфликтот, пратките сè уште не стигнуваат нормално до Иран, Ирак, Катар и Саудиска Арабија, па купувачите и извозниците го одложуваат склучувањето нови договори.
Индија најмногу извезува басмати ориз во Саудиска Арабија, Ирак, Иран и Обединетите Арапски Емирати, додека другите сорти ги пласира во земји како Бангладеш, Бенин, Брегот на Слоновата Коска, Гвинеја и Камерун.
Иран до минатата година беше најголем извозен пазар за индискиот басмати ориз, но според официјалните податоци, Саудиска Арабија го презела првото место.
Трошоците за осигурување и транспорт се зголемиле од почетокот на американско-израелските воздушни напади врз Иран кон крајот на февруари, што го наруши поморскиот сообраќај низ Ормускиот Теснец, наведува извозник од Какинада, на југоистокот на Индија.
На светскиот пазар на ориз, Индија се натпреварува со Тајланд, Виетнам, Мјанмар и Пакистан. Намалените испораки во странство претставуваат дополнителен притисок врз цените на домашниот пазар, кои поради рекордната жетва паднале за повеќе од пет проценти од почетокот на годината.
