Замастениот црн дроб е една од најчестите болести на денешницата, а лекарите предупредуваат дека проблемот сè повеќе е поврзан со начинот на живот и исхраната. Иако порано состојбата беше позната како неалкохолна масна болест на црниот дроб, денес медицината користи нов термин – метаболичка стеатотична болест на црниот дроб поврзана со метаболна дисфункција (MASLD).

Според хепатолозите, болеста не е поврзана само со дебелината, туку и со метаболниот синдром, кој вклучува дијабетес, покачен шеќер во крвта, висок крвен притисок, холестерол и натрупување масти во пределот на стомакот.

Гастроентерологот и хепатолог д-р Руче Шах вели дека најважниот прв чекор кај пациентите со замастен црн дроб е намалување на внесот на шеќер. Според неа, прекумерниот шеќер доведува до таложење масти во црниот дроб и поттикнува воспалителни процеси кои со текот на времето можат да предизвикаат сериозни оштетувања, па дури и цироза.

Истражувањата покажуваат дека намалувањето на засладените пијалаци и храната богата со додаден шеќер може значително да помогне во намалување на маснотиите во црниот дроб. Дополнително, прекумерниот внес на шеќер ја зголемува инсулинската резистенција и ризикот од дијабетес тип 2.

Светската здравствена организација препорачува додадените шеќери да не надминуваат 10 проценти од дневниот внес на калории, што е околу 50 грама шеќер дневно кај исхрана од 2.000 калории.

Лекарите советуваат наместо слатки и преработена храна да се консумираат намирници богати со протеини и растителни влакна, бидејќи подолго создаваат чувство на ситост. Како поздрава алтернатива на рафинираниот шеќер се препорачуваат мед, урми и природни засладувачи во умерени количини.

Покрај намалувањето на шеќерот, важно е и избегнување алкохол, како и редовна физичка активност. Медитеранската исхрана, која вклучува овошје, зеленчук, маслиново масло, риба и немасни протеини, се смета за една од најдобрите за здравјето на црниот дроб.