Грејпфрутот и неговиот сок содржат природни соединенија што го блокираат ензимот CYP3A4, кој е задолжен за разградување на многу лекови во организмот. Поради тоа, кај некои терапии концентрацијата на лекот во крвта може опасно да се зголеми, додека кај други, пак, неговото дејство може да се намали. 

Особено внимание треба да обрнат лицата кои земаат лекови за намалување на холестеролот (статини), лекови за висок крвен притисок, одредени антиаритмици, имуносупресиви, лекови против анксиозност, како и некои антихистаминици и кортикостероиди. Кај овие терапии комбинацијата со грејпфрут може да предизвика сериозни несакани реакции. 

Лекарите предупредуваат дека не е доволно само лекот и грејпфрутот да се консумираат во различно време од денот. Ефектот на овошјето врз ензимите може да трае повеќе часови, па затоа кај лековите што имаат интеракција најчесто се препорачува целосно избегнување на грејпфрут и сок од грејпфрут за време на терапијата. 

Покрај грејпфрутот, сличен ефект можат да имаат и помелото, тангелото и горчливиот севилски портокал, кои исто така содржат соединенија што влијаат врз метаболизмот на одредени лекови. 

Доколку користите терапија на рецепт или лекови што се издаваат без рецепт, експертите советуваат секогаш да го прочитате упатството и да се консултирате со лекар или фармацевт пред да консумирате грејпфрут или негов сок.