Lancia Delta со години беше најавувана како еден од клучните модели во обновата на италијанскиот бренд. Плановите предвидуваа модерна електрична верзија која ќе го врати славното име на пазарот, но во најновите стратешки документи на Stellantis овој модел повеќе не е наведен. Наместо тоа, се споменуваат само модели кои сè уште се во фаза на проучување.
Официјална потврда дека проектот е откажан засега нема, но неговото исчезнување од плановите предизвика загриженост кај љубителите на брендот. Според автомобилските медиуми, можно е развојот да биде одложен поради промените во стратегијата на Stellantis и прераспределбата на инвестициите кон други модели.
Lancia Delta е еден од најпрепознатливите автомобили во историјата на европската автомобилска индустрија. Особено верзијата Delta HF Integrale стекна култен статус благодарение на доминацијата во Светскиот шампионат во рели, каде што Lancia освои шест последователни титули кај производителите.
Иако иднината на Delta останува неизвесна, Lancia продолжува со обновата на брендот преку новите модели Ypsilon и Gamma, како и со враќањето во рели натпреварувањата. Дали легендарната Delta повторно ќе се најде во производствената програма ќе зависи од идните одлуки на Stellantis.
