Google заврши големо ажурирање на својата услуга Street View за четири земји од Западен Балкан Македонија, Србија, Албанија и Црна Гора. Специјализирани возила на компанијата поминале повеќе од 103 илјади километри низ регионот, собирајќи нови 360-степени панорамски снимки со висока резолуција.

Новите податоци се достапни преку Google Maps и Google Earth, а на корисниците им овозможуваат подетално виртуелно разгледување на улици, градови, патишта, туристички локации и природни знаменитости.

Од Google велат дека ажурирањето носи појасен приказ на урбаните промени и инфраструктурниот развој во последните години, овозможувајќи им на корисниците полесна ориентација, планирање патувања и истражување на различни делови од регионот.

Новите снимки опфаќаат голем број градови и туристички места. Во Албанија се обновени приказите на Тирана, Драч и Валона, но и на историскиот град Берат, познат како „градот на илјада прозорци“, кој е под заштита на УНЕСКО, како и природната атракција „Сино око“.

Во Црна Гора, Street View донесува нови панорамски погледи од Котор, неговите средновековни ѕидини, Будва и Подгорица, вклучувајќи ја и препознатливата Милениумска градба.

Со обновувањето на снимките, корисниците сега можат виртуелно да ги истражуваат и улиците, природните предели и културните знаменитости во Северна Македонија и Србија со подобар квалитет на сликата.

Проектот претставува едно од најголемите регионални ажурирања на Street View во последните години и овозможува попрецизна дигитална мапа на Западен Балкан – од урбаните центри до најоддалечените туристички дестинации.