Шумски пожар што вчера избувна во близина на басенот Аркашон, во францускиот департман Жиронда, се прошири на околу 2.000 хектари, а речиси 12.000 луѓе се евакуирани како превентивна мерка, соопшти локалната префектура. Властите утрово наредија евакуација на дополнителни околу 7.000 жители и туристи. Мерката опфаќа шест кампови и станбена зона северно од Кап Ферет, една од најпопуларните туристички дестинации во регионот за време на летната сезона.

Префектурата претходно информираше дека најмалку 4.600 лица веќе биле евакуирани од домовите и сместувачките капацитети во загрозеното подрачје.

Пожарникарските екипи продолжуваат со борбата против огнената стихија, додека властите стравуваат од дополнително ширење на пожарот поради високите температури, сувата вегетација и неповолните временски услови.