Македонската платформа против сиромаштија на 16 јуни ќе го одржи деветтото доделување на наградите „Гласник на невидливите“, посветени на новинари кои известуваат за сиромаштијата, социјалната исклученост и приказните на луѓето кои најчесто остануваат надвор од јавниот фокус.

Настанот ќе се одржи во Cowork21, на улица Македонија бр. 8 во Скопје, со почеток во 18:00 часот.

Годинашното издание има силен меѓународен карактер. Од 15 до 17 јуни, Македонската платформа против сиромаштија е домаќин на претставници од осум национални мрежи против сиромаштија, како и на комуникацискиот тим на Европската мрежа против сиромаштија.

Во рамки на доделувањето на наградите ќе се одржи и отворена панел-дискусија на тема „Медиумите и сиромаштијата – гласно против тишината“. Дискусијата ќе отвори простор за разговор за улогата на новинарството во видливоста на сиромаштијата, начинот на кој медиумите известуваат за социјалните неправди и потребата гласот на најранливите граѓани да биде присутен во јавноста.

Организаторите најавуваат дека настанот ќе биде можност за вмрежување и размена на искуства со новинари, комуникациски експерти и луѓе со лично искуство со сиромаштија од повеќе европски земји.

Активностите се реализираат во рамки на меѓународниот проект „Journalism-prize goes international“, кој се спроведува во конзорциум предводен од Австриската мрежа против сиромаштија, а е финансиран од ЕРСТЕ Фондацијата.

Наградите „Гласник на невидливите“ имаат за цел да го препознаат и поттикнат новинарството кое не ги остава на маргините луѓето погодени од сиромаштија, туку ги отвора нивните приказни како важен дел од јавниот интерес.