Нови напади со дронови и наведувани бомби однесоа човечки животи од двете страни, а Финска ја укина привремената зона со ограничување на летовите во Финскиот Залив.

Борбите меѓу Русија и Украина продолжија и во текот на ноќта со нови напади со дронови и наведувани бомби, при што загинаа повеќе лица, а беа оштетени складишта во близина на Москва и Санкт Петербург.

Според руските власти, во напад со украински дронови во Московската област загинале пет лица, а шестмина се повредени. Избувнал и пожар во складишен објект, кој подоцна бил изгаснат. Во близина на Санкт Петербург, дрон погодил складиште, при што едно лице е повредено. Меѓу оштетените објекти е и магацин на компанијата „Вајлдберис“.

Во меѓувреме, Финска соопшти дека ја укинува привремената зона со ограничување на летовите во источниот дел на Финскиот Залив. Одлуката ја објавија финските одбранбени сили, без дополнителни детали за причините.

На украинска територија, руски напади со наведувани бомби врз градот Суми усмртија три лица, меѓу кои две деца, а неколкумина се повредени. Во руската Белгородска област, пак, една жена загина, а две лица се ранети кога дрон погодил автомобил.

Независна потврда на сите информации засега нема. И Русија и Украина продолжуваат да негираат дека намерно гаѓаат цивилни цели во војната што започна со руската инвазија во февруари 2022 година.