Лековите и пристапот до медицинска грижа треба да бидат достапни во сите земји членки на Европска Унија, а зајакнувањето на европската фармацевтска индустрија е дел од решението за намалување на зависноста од лекови од трети земји, порачаа европратениците на првиот ден од мајската пленарна седница.
Еврокомесарот за здравство и безбедност на храната Оливер Вархеји изјави дека „пациентите во Европската Унија треба да имаат пристап до безбедни, ефикасни и достапни лекови, без разлика каде живеат“, за време на расправата „Европска солидарност: клуч за обезбедување пристап до лекови во геополитички променлив период“ во Европски парламент.
„Знам дека ја делиме оваа заедничка цел, бидејќи минатата недела направивме многу важен чекор напред кога постигнавме привремен политички договор за Актот за критични лекови“, рече Вархеји.
Тој додаде дека со новиот закон се обезбедува земјите членки да можат да создаваат резерви за итни ситуации, но и да не се нарушува снабдувањето со лекови во другите земји од ЕУ.
Сокол: Безбедноста на снабдувањето со лекови станува клучно европско прашање
Хрватскиот европратеник Томислав Сокол нагласи дека токму Актот за критични лекови е одговорот на овој проблем.
„Во период на сè поголема зависност од генерички лекови од Кина и Индија, како и поради притисокот иновативната индустрија да се пресели во САД, безбедноста на снабдувањето со лекови станува клучно прашање за европската безбедност“, изјави Сокол.
Тој предупреди дека создавањето залихи не смее да доведе до недостиг на лекови во други земји членки, бидејќи тоа го нарушува принципот на европска солидарност. Новите правила предвидуваат и механизам за солидарна распределба на лекови, односно земјите што имаат резерви да испраќаат лекови во државите каде што има недостиг.
„Ниту еден европски граѓанин не смее да остане без потребниот лек затоа што земјите членки дејствуваат секоја за себе“, порача Сокол.
Фармацевтската индустрија и европскиот суверенитет
Литванскиот европратеник Витенис Андриукаитис од редовите на социјалдемократите изјави дека европската солидарност мора итно да биде поддржана со силен и глобално конкурентен фармацевтски сектор. Унгарската европратеничка Викторија Ференц порача дека ЕУ мора повеќе да вложува во истражување и развој во фармацевтската индустрија за да го зајакне европскиот стратешки суверенитет.
Италијанскиот европратеник Руџеро Раца истакна дека Европа во 90-тите произведувала повеќе од 80 проценти од активните состојки за сопствената фармацевтска индустрија, додека денес тој удел паднал на 30 проценти, бидејќи најголемиот дел доаѓа од Индија и Кина.
Португалската европратеничка Кристина Мартинс од Левицата оцени дека „фармацевтската индустрија сама по себе нема да ја обезбеди Европската Унија“, додавајќи дека безбедноста е одговорност на институциите.
