Европската унија денеска додаде уште пет лица од рускиот воено-индустриски комплекс на својата листа на санкции. Одлуката, како што соопштија од Брисел, е директен одговор на појачаните руски напади врз цивили и цивилна инфраструктура низ Украина, меѓу кои се и последните разорни воздушни удари врз Киев. Во фокусот на новите казнени мерки се раководителите на фабриките што ги произведуваат ракетните системи Искандер-М и Сармат.

Меѓу новите имиња на црната листа на ЕУ се наоѓа Рамил Бадгутдинов, првиот човек на компанијата вклучена во производството на балистичките проектили Искандер-М. Покрај него, санкциониран е и Александар Дјукарев, директор на фабриката „КрасМаш“, каде што се произведуваат балистичките ракети од новата генерација Сармат. Иако Москва сè уште ги нема употребено ракетите Сармат на боиштето во Украина, нивното тестирање и развој се под постојан надзор на западните служби.

Останатите три санкционирани лица се директори на руски одбранбени компании кои произведуваат критична опрема за руските сили. Соопштението од Брисел наведува дека нивните фирми развиваат напредни комуникациски системи, специјализиран софтвер за управување со беспилотни летало и воени технологии поврзани со вселенското истражување. Со овие мерки, ЕУ се обидува дополнително да го забави технолошкиот синџир на снабдување на руската армија.

Шефицата за надворешна политика на ЕУ, Каја Калас, истакна дека секој нов напад врз цивилни цели во Украина бара дополнително заострување на мерките против Кремљ. Таа оцени дека Москва ја интензивира кампањата против цивилното население бидејќи нејзините копнени сили се соочуваат со застој на линијата на фронтот. Според Калас, ЕУ ќе продолжи со воведување нови ограничувања сè додека Русија не ги прекине сите воени дејствија.