Голем број странски компании, меѓу кои и европски хотелиерски и транспортни групации, ги намалуваат или прекинуваат своите активности на Куба поради новите американски санкции и зголемениот ризик од работа со компании поврзани со кубанската држава и воениот сектор.

Најголемо внимание предизвика одлуката на шпанската хотелска групација Meliá веднаш да се повлече од управување, маркетинг и користење на својот бренд во 15 хотели на Куба. Компанијата како причина ги наведе влошените геополитички, правни и економски услови на островот.

Претходно и Iberostar најави повлекување од дел од своите хотелски операции поврзани со Куба. Според „Euronews“, Iberostar се повлекува од 12 хотели, додека Meliá прекинува активности во 15 хотели, во услови на засилен американски притисок врз компании што соработуваат со структури поврзани со GAESA, кубанскиот воен бизнис-конгломерат.

Под притисок не е само туризмот. Францускиот транспортен гигант CMA CGM и германскиот Hapag-Lloyd ги суспендираа резервациите и нарачките поврзани со Куба, повикувајќи се на ризици за усогласеност со новата извршна наредба на американскиот претседател Доналд Трамп од 1 мај.

Новите мерки имаат ефект на таканаречени секундарни санкции, односно можат да погодат и компании надвор од САД доколку имаат американски имот, деловни врски со американскиот финансиски систем или соработуваат со санкционирани кубански субјекти. Правни анализи предупредуваат дека ваквиот режим може да ги натера многу неамерикански компании да го намалат или прекинат бизнисот поврзан со Куба.

Кубанската економија дополнително е погодена и од финансиската изолација. Куба најави суспензија на трансакциите преку Visa и Mastercard од 6 јуни, наведувајќи дека засилените американски санкции довеле до ограничување на работењето на странски партнер кој ги обработувал картичните плаќања.

Најпогоден е туристичкиот сектор, кој е еден од клучните извори на девизи за земјата. Повлекувањето на големи хотелски брендови и транспортни компании може дополнително да ја продлабочи кризата во кубанската економија, која веќе се соочува со пад на туризмот, недостиг на енергија и ограничен пристап до меѓународни финансиски услуги.

Иако Европската Унија има регулативи со кои се спротивставува на екстратериторијалното дејство на американските санкции, компаниите очигледно прават сопствени проценки на ризик. За многу од нив, опасноста од губење пристап до американскиот финансиски систем е поголема од потенцијалната добивка од останување на кубанскиот пазар.