Европската Унија условно го одобри преземањето на Warner Bros. Discovery од страна на Paramount Skydance, зделка вредна околу 110 милијарди долари. Сепак, реализацијата на спојувањето останува неизвесна, откако федерален судија во Калифорнија привремено го запре процесот.
Европската комисија соопшти дека одобрувањето е условено со мерки што треба да ја заштитат конкуренцијата на европскиот пазар за филмска дистрибуција.
Според условите, Paramount ќе мора да се откаже од својот удел во United International Pictures (UIP) – заедничка компанија за дистрибуција на филмови со Universal, која работи на пазарот на Европската економска област.
Дополнително, Европската комисија воведе десетгодишна забрана Paramount да склучува директни или индиректни договори со Universal за заедничка дистрибуција на филмови во Европската економска област.
„Овие обврски целосно ги отстрануваат ризиците за нарушување на конкуренцијата. Тие гарантираат дека филмовите на новата компанија нема да се дистрибуираат заедно со филмовите на Universal или Disney“, соопшти Европската комисија, додавајќи дека спроведувањето на мерките ќе го следи независен надзорник.
Комисијата оцени дека спојувањето нема значително да ја наруши конкуренцијата во филмската продукција, имајќи предвид дека на пазарот остануваат силни конкуренти како Disney, Amazon MGM Studios и бројни европски продуцентски куќи.
Правни пречки во САД
И покрај одобрението од Брисел, трансакцијата се соочува со правни пречки во САД. Федерален судија во Калифорнија привремено ја блокираше зделката, а рочиште за евентуална подолгорочна забрана е закажано за 3 август. Доколку судот ја продолжи мерката, финализирањето на спојувањето може значително да се одложи.
Планираното спојување предизвика силни реакции во филмската индустрија. Критичарите предупредуваат дека, доколку биде реализирано, бројот на големи американски филмски студија ќе се намали на само четири.
Според нив, тоа може да доведе до масовни отпуштања, намалување на бројот на филмови што се продуцираат и дистрибуираат, како и до слабеење на конкуренцијата во индустријата.
Европската Унија условно ја одобри зделката вредна 110 милијарди долари меѓу Paramount Skydance и Warner Bros. Discovery, но постави строги услови за заштита на конкуренцијата, додека процесот во САД е привремено блокиран.
