Авионскиот производител „Ербас“ комплетираше рекорден тест-лет со модел Ербас А350, кој леташе над 24 часа без престан од Мелбурн до францускиот град Тулуз. Летот е главна фаза од иницијативата „Проект Санрајс“ на австралиската компанија „Кантас“, со која треба да се воспостават најдолгите комерцијални патнички линии во светот.
Специјално модифицираниот авион А350-1000ULR остана во воздух точно 24 часа и 24 минути. За тоа време леталото помина дистанца од 23.075 километри, по што слета во фабричкиот центар на „Ербас“ во Тулуз. Авионот е опремен со посебно дизајниран дополнителен резервоар кој носи уште 20.000 литри гориво и овозможува капацитет за 238 патници.
Платформата за следење летови „Флајтрадар24“ соопшти дека овој лет бил втор најследен во историјата на нивниот сервис, со повеќе од 3,6 милиони луѓе кои ја следеа неговата патека преку Канада. Единствен последен лет досега останува оној од 2024 година со ковчегот на британската кралица Елизабета Втора.
Овој маратонски лет е дел од двомесечната тест-кампања што започна во јуни. Австралискиот превозник „Кантас“ веќе нарача 12 вакви авиони за директно да го поврзе источниот брег на Австралија со Лондон и Њујорк за околу 20 часа.
Со оваа линија, некогашната „Кенгуру рута“, за која порано беа потребни пет дена со повеќе застанувања, се сведува на еден директен лет во траење од 19 до 21 час, во зависност од ветерот и маршрутата.
Првиот авион од оваа серија треба да биде испорачан во април 2027 година, додека „Кантас“ планира да ги започне секојдневните директни летови меѓу Сиднеј и Лондон во октомври 2027 година.
Со овој потфат е надминат и претходниот рекорд од 2005 година, кога авионот „Боинг 777-200LR“ прелета 21.601,7 километри од Хонгконг до Лондон за 22 часа и 42 минути.
