Електричните и хибридните автомобили сè повеќе го освојуваат европскиот пазар. Во 2024 година, дури 43% од увезените автомобили во Европската Унија биле електрични или хибридни, покажуваат податоците на Евростат.
Од друга страна, овие возила сочинуваат околу 28% од извозот на автомобили од ЕУ, што покажува дека побарувачката расте и на глобално ниво.
Најголем дел од увозот се однесува на хибридни возила, особено оние што не се полнат на струја, додека целосно електричните автомобили сочинуваат околу 16% од увозот.
Кина е водечки извозник на електрични автомобили во ЕУ и учествува со 55% од вкупниот увоз на вакви возила, додека зад неа се Јужна Кореја, Јапонија и САД.
Во рамките на самата Европска Унија, од вкупно произведените 12,1 милиони автомобили во 2024 година, речиси една третина се електрични или хибридни, што покажува јасен тренд кон почиста и поодржлива мобилност.
Вредноста на производството на автомобили во ЕУ достигнала 322 милијарди евра, при што значителен дел доаѓа токму од електричните и хибридните возила.
Овие податоци покажуваат дека транзицијата кон електрични возила не е повеќе иднина, туку веќе реалност која брзо се развива низ Европа.
