Демократска Република Конго предупреди на забрзано ширење на ебола, откако во последните 24 часа беа регистрирани 71 нов потврден случај на заразата. Според најновите податоци на Министерството за здравство, од почетокот на епидемијата на 15 мај досега се потврдени вкупно 452 случаи на инфекција со реткиот сој на вирусот Бундибугио, додека бројот на починати достигна 82 лица.
Жариштето останува во североисточниот дел на земјата
Најголемиот број заболени се регистрирани во покраината Итури, во североисточниот дел на земјата, регион кој со години се соочува со безбедносни проблеми, вооружени конфликти и ограничен пристап до здравствени услуги. Здравствените власти предупредуваат дека ширењето на вирусот во локалните заедници дополнително го отежнува контролирањето на епидемијата.
Генералниот директор на Светска здравствена организација, Тедрос Адханом Гебрејесус, претстави шестмесечен план вреден 518 милиони долари за справување со кризата.
Тој ги повика владите и меѓународните донатори да обезбедат финансиска и политичка поддршка за спречување на натамошното ширење на болеста. Според СЗО, актуелната епидемија веќе се смета за четврта најголема регистрирана епидемија на ебола досега.
САД најавија дополнителна помош
Американскиот Стејт департмент соопшти дека ќе обезбеди дополнителни 38 милиони долари за борба против заразата, со што вкупната американска помош ќе надмине 200 милиони долари. Воедно, беше најавено дека американски државјани кои биле изложени на вирусот, но не покажуваат симптоми, ќе бидат сместувани во специјален карантински центар во Кенија.
Од американскиот Центар за контрола и превенција на болести (CDC) предупредуваат дека актуелната ситуација може дополнително да се влоши. Според компјутерските модели на агенцијата, доколку бројот на изолирани пациенти остане низок и не се зајакнат мерките за контрола, оваа епидемија би можела да стане една од најголемите и најсмртоносните во историјата на еболата.
Експертите предупредуваат дека брзата идентификација на заразените, нивната изолација и меѓународната поддршка ќе бидат клучни за спречување на понатамошно ширење на вирусот.
