Компанијата SpaceX на Илон Маск го реализираше најголемото иницијално јавно понудување на акции (IPO) во историјата, собирајќи вкупно 85,7 милијарди долари по излегувањето на Њујоршката берза. Првично беа обезбедени 75 милијарди долари, но поради огромниот интерес на инвеститорите банките кои го водеа процесот ја активираа таканаречената „greenshoe“ опција, преку која беа продадени дополнителни акции во вредност од уште 10 милијарди долари.

Меѓу финансиските институции што учествуваа во понудата беа „Goldman Sachs“, „Bank of America“ и „JPMorgan“, кои купија дополнителни 83,3 милиони акции за да ја задоволат исклучително високата побарувачка. Со дебито на берзата, вредноста на SpaceX беше проценета на околу 1,8 билиони долари, што ја вбројува компанијата меѓу највредните во светот. Акциите на инвеститорите им беа понудени по цена од 135 долари, а веќе првиот целосен ден на тргување пораснаа за повеќе од 14 проценти и достигнаа 184 долари.

Според пресметките на финансиската агенција „Блумберг“, успешното IPO го направило Илон Маск првиот човек во светот чија нето-вредност на хартија надминала еден билион долари. Сепак, најголемиот дел од неговото богатство останува врзан за пазарната вредност на SpaceX и може значително да варира во зависност од движењата на берзата.

И покрај ентузијазмот на инвеститорите, дел од аналитичарите предупредуваат дека високата проценка на компанијата остава мал простор за грешки. Тие посочуваат дека SpaceX сè уште работи со загуба и ќе мора да го оправда огромниот пазарен ентузијазам во услови на засилена конкуренција и построг регулаторен надзор во вселенската индустрија. Средствата собрани преку IPO ќе бидат искористени за финансирање на нова фаза од развојот на компанијата, вклучително и проширување на вселенските програми и инфраструктурата за идните мисии.