На грчкиот полуостров Халкидики вчера беа евакуирани жителите и туристите од Сивири и Фурка, откако големиот шумски пожар за само неколку часа се приближил до населените места. Околу 250 жители и туристи биле принудени да го напуштат подрачјето, а дел од нив со чамци преку морето биле пренесени на безбедно. Евакуацијата по море била единствената можна опција во одредени моменти, додека на копно се создале големи сообраќајни метежи.

Повеќе од 200 припадници на итните служби во текот на денот се бореле со огнената стихија. Властите вечерта соопштиле дека пожарот е ставен под контрола.

Но, додека состојбата на Халкидики се смирува, нов драматичен пожар беснее во Хрватска. Во текот на ноќта била наредена евакуација на туристичкото место Локва Рогозница, на јадранскиот брег. Пожарникарите ситуацијата ја оценуваат како исклучително тешка поради силниот ветер, кој постојано повторно го разгорува пожарот.

Околу 150 пожарникари се борат со огнот, а според медиумските извештаи пламените јазици стигнале до самите граници на населеното место. Пријавено е и дека куќи биле уништени, додека снимките покажуваат огромни пламени јазици во непосредна близина на објектите.

ХРТ јавува дека штетата веќе е значителна.

Од грчките туристички места, каде што луѓето бегаа со чамци, до хрватскиот брег каде што огнот стигнува до домовите – пожарите повторно го погодија срцето на туристичката сезона.