Долги колони граѓани се формираат на повеќе места низ Србија каде што се собираат потписи за поддршка на студентската изборна листа „Студентите победуваат“. Само во Белград потпишувањето е организирано на повеќе десетици локации.

Пред пунктот на улицата „Косовска“ број 6 во Земун голем број граѓани чекаат да дојдат на ред. Потписите таму се собираат од 10 до 17 часот, објави N1 Србија.

Дел од присутните велат дека чекале и претходниот ден, но не успеале да дадат потпис бидејќи постапката се одвивала многу бавно.

„Ќе чекам додека не стигнам на ред“, изјавила една жителка на Земун.

Таа вели дека ги поддржува студентите бидејќи сака нејзиниот внук да остане да живее и да се школува во Србија.

Друга граѓанка раскажала дека претходниот ден чекала на Авијатичарскиот плоштад, но не успеала да стигне на ред.

„Младите луѓе имаа храброст и смелост да се борат. Можеби ние требаше многу порано да го расчистиме тоа, но сега сме тука да им помогнеме колку што можеме“, изјавила таа за N1.

Проблеми со нотарите

Студентите и дел од опозициските партии претходниот ден се соочиле со проблеми при обезбедувањето нотари за заверување на потписите. Според N1, Српската напредна странка и Социјалистичката партија на Србија немале такви проблеми и први ги предале своите потписи до Републичката изборна комисија.

Еден од кандидатите на студентската листа, Жељко Хубач, најавил дека листата „Студентите победуваат“ треба да биде предадена до изборната комисија в понеделник.

Предвремените парламентарни избори во Србија се закажани за 25 октомври 2026 година.

Извор: N1 Србија