По серијата исклучително топли денови, утре (21 јули) во Македонија ќе продолжи претежно сончево и многу топло време, но во попладневните часови се очекува локална нестабилност со развој на облачност, краткотраен пороен дожд и грмежи, особено во западните и северните делови од земјата.

Максималните дневни температури ќе останат високи и во поголем дел од земјата ќе се движат меѓу 34 и 40 Целзиусови степени, додека во повисоките планински подрачја ќе биде посвежо. Ќе дува слаб до умерен ветер, кој повремено ќе засилува во зоните каде ќе има нестабилност.

И понатаму се препорачува да се избегнува престој на отворено во периодот од 11 до 17 часот, да се внесуваат доволно течности и да се внимава на постарите лица, хронично болните и малите деца, кои се најранливи на високите температури.

Според прогнозите, иако жештината ќе продолжи, во следните денови има услови за постепено освежување со почеста појава на локални нестабилности.