По неколку дена со екстремно високи температури, Македонија и понатаму ќе биде под влијание на топол воздушен бран, но во текот на следните денови се очекува благо намалување на температурите и локална нестабилност во попладневните часови.

Според прогнозата на Управата за хидрометеоролошки работи (УХМР), денес времето ќе биде сончево и многу топло, со мала до умерена локална облачност и слаб до умерен ветер, претежно од северен правец. Максималната дневна температура ќе се движи од 30 до 38 степени, а УВ-индексот ќе остане многу висок.

Во Скопје се очекува сончево време со слаб северен ветер и температура до околу 36 степени, додека најтопло ќе биде во Повардарието и југоисточните делови од земјата.

Од недела можни локални врнежи

Според прогнозите, во недела попладне постојат услови за локална нестабилност со краткотраен дожд и грмежи, особено во западните и северните делови на земјата. И покрај тоа, времето ќе остане топло, со дневни температури меѓу 32 и 36 степени, а од почетокот на новата работна недела се очекува благо освежување и нешто попријатни утрински температури.

Висок ризик од топлотен стрес

Метеоролозите предупредуваат дека и понатаму ќе има висок ризик од топлотен стрес, особено во периодот од 11 до 17 часот. Најранливи се постарите лица, хронично болните, малите деца и лицата кои работат на отворено.

Надлежните препорачуваат: да се избегнува престој на директно сонце во најтоплиот дел од денот ,да се внесуваат повеќе течности, да се носи лесна и светла облека и да се внимава при патување поради високите температури и силното сончево зрачење.

Според моменталните прогнози, иако следува мало намалување на температурите, вистинско освежување засега не се очекува, а летното време ќе продолжи и во текот на следната седмица.