Новата поетска збирка „Длабок простор“ од Зоран Анчевски ќе биде промовирана на 16 јуни, вторник, со почеток во 20 часот, во книжарницата „Литература.мк“ во „Дајмонд мол“.
Книгата е во издание на „Арс Либрис“, дел од „Арс Ламина – публикации“, а промоторки на настанот ќе бидат Лидија Капушевска Дракулевска, Биљана Стојановска и Оливера Ќорвезироска.
„Длабок простор“ е десетта поетска збирка на Анчевски. Таа продолжува таму каде што завршуваат неговите претходни книги, но истовремено отвора нови поетски патишта и предели во кои песната скршнува, понира и повторно се враќа попрецизна, побогата и подлабока.
Згуснатата лирика на Анчевски, препознатлива по својата гномска ориентација и стремежот кон совршенство на поетскиот израз, во оваа книга е обликувана низ строго осмислен и доследно реализиран концепт.
Збирката е составена од пролог, пет циклуси и кода – завршна песна што ја заокружува книгата како своевидна програмска песна за песната, онаква каква што ја подразбира и создава Анчевски.
„Длабок простор“ е втора книга на Анчевски објавена во издание на „Арс Ламина“, по наградуваната поема „Коњски житија“, која во 2023 година ја доби престижната награда „Григор Прличев“.
Зоран Анчевски е поет, есеист, книжевен преведувач и универзитетски професор. Дипломирал и докторирал на Филолошкиот факултет во Скопје, каде што работел како професор на Катедрата за англиски јазик и книжевност при Филолошкиот факултет „Блаже Конески“.
Член е на Македонскиот ПЕН центар, чиј претседател бил во минатото, како и на Друштвото на писателите на Македонија.
Автор е на повеќе значајни поетски книги, меѓу кои „Патување низ скршени слики“, „Стратегија на поразот“, „Линија на отпорот“, „Превод на мртвите“, „Див мир“, „Небесна пантомима“, „Збунети компаси“ и „Коњски житија“.
За своето творештво Анчевски е добитник на повеќе престижни признанија, меѓу кои наградата за поема „Григор Прличев“, наградата „Ацо Шопов“ на Друштвото на писателите на Македонија и двократно наградата „Браќа Миладиновци“ на Струшките вечери на поезијата.
Поетската збирка „Длабок простор“ е достапна во поголемите книжарници и онлајн преку „Литература.мк“.
