Девојчињата поминуваат значително повеќе време на социјалните мрежи во споредба со нивните машки врсници, покажа најновиот извештај на Организацијата за економска соработка и развој (ОЕЦД). Во време кога дигиталните платформа стануваат главен простор за социјализација, оваа разлика носи посебни ризици за менталното здравје. Експертите предупредуваат дека девојчињата се поизложени на нереални стандарди за убавина, кибер-малтретирање и притисок за постојана достапност онлајн, што бара итна реакција од родителите и институциите.
Податоците од истражувањето покажуваат дека иако сите млади поминуваат сѐ повеќе часови пред екраните, девојчињата најмногу ги користат платформите како ТикТок, Инстаграм и Снапчет. За разлика од момчињата кои поголем дел од слободното време го поминуваат во играње видеоигри, девојчињата се фокусирани на содржини базирани на слики, видеа и директна социјална интеракција.
Оваа разлика во начинот на користење на технологијата директно влијае врз психолошкиот развој. Анализата истакнува дека девојчињата се склони кон подлабока социјална споредба, што дополнително ја зголемува нивната ранливост.
Прекумерниот престој на социјалните мрежи кај тинејџерките директно се поврзува со пораст на симптомите на анксиозност и намалена самопочит. Изложеноста на филтрирани фотографии и идеализирани животи креира социјален притисок на кој младите девојчиња тешко му одолеваат.
Дополнително, алгоритмите на социјалните мрежи често агресивно форсираат содржини поврзани со диети, изглед и естетски корекции, што создава дополнителен стрес и проблеми со исхраната или сликата за сопственото тело.
Експертите од ОЕЦД препорачуваат институциите и училиштата да воведат системски програми за дигитална пиписменост, но и построги законски рамки за технолошките гиганти. Барањата вклучуваат ограничување на алгоритмите што предизвикуваат зависност, подобра контрола на возраста и поголема транспарентност за тоа како се обработуваат податоците на малолетниците.
Родителите, од друга страна, се советуваат да не се ослонуваат само на технички забрани, туку да градат отворен дијалог со децата за да ги препознаат штетните влијанија на дигиталниот свет.
