Западнонилската треска е вирусно заболување кое се пренесува преку убод од заразен комарец. Вирусот природно циркулира меѓу птиците, а комарците го пренесуваат на луѓето. Болеста не се пренесува од човек на човек преку секојдневен контакт. 

Во Македонија ова лето се регистрирани повеќе случаи на заболени, а здравствените власти внимателно ја следат состојбата. Дел од пациентите се хоспитализирани, при што кај некои се развиле потешки форми на болеста. 

Кај околу 80 проценти од заразените вирусот не предизвикува никакви симптоми. Кај останатите најчесто се јавуваат покачена температура, главоболка, замор, болки во мускулите и зглобовите, гадење, повраќање, осип и зголемени лимфни јазли. Овие симптоми обично траат неколку дена и најчесто поминуваат без посериозни последици. 

Кај помалку од еден процент од заразените, особено кај лица постари од 60 години и кај луѓе со ослабен имунитет или хронични заболувања, вирусот може да го зафати нервниот систем и да предизвика менингитис или енцефалитис. Во тие случаи може да се појават вкочанет врат, силна главоболка, конфузија, нарушена свест, тремор, слабост на екстремитетите или епилептични напади. 

Засега не постои специфичен лек ниту вакцина за луѓето против западнонилската треска. Лекувањето е насочено кон ублажување на симптомите, а кај потешките случаи е потребно болничко лекување и интензивен медицински надзор. 

Лекарите препорачуваат граѓаните да се заштитат од каснување од комарци со употреба на репеленти, носење облека со долги ракави и ногавици, поставување заштитни мрежи на прозорците и избегнување престој на отворено во периодите кога комарците се најактивни. Исто така, се препорачува отстранување на застојаната вода околу домовите, каде што комарците најчесто се размножуваат.