На 6 јуни 1944 година, во една од најважните воени операции во историјата, сојузничките сили започнаа со истоварување во Нормандија, познато како Ден Д (D-Day) и операција „Оверлорд“. Овој потег означи отворање на долгоочекуваниот западен фронт против нацистичка Германија и претставуваше почеток на ослободувањето на Западна Европа од германската окупација.

Стратешки несогласувања меѓу сојузниците

По германската инвазија на Советскиот Сојуз во 1941 година, сојузниците бараа начин да го намалат притисокот врз Црвената армија и да отворат нов фронт против силите на Адолф Хитлер. Британскиот премиер Винстон Черчил се залагаше за напад преку Балканот, сметајќи дека така ќе се ограничи идното советско влијание во Источна Европа.

Американското воено раководство, предводено од Двајт Ајзенхауер, инсистираше на директен напад преку Ла Манш и искрцување во Франција. На крајот преовлада американскиот план.

Најголемото искрцување во историјата

Во раните утрински часови на 6 јуни 1944 година, повеќе од 130.000 сојузнички војници пристигнаа на бреговите на Нормандија по морски пат, додека околу 25.000 падобранци и воздушнодесантни единици беа распоредени зад германските линии. Операцијата беше поддржана од огромна флота и масовни воздушни напади врз германските утврдувања долж францускиот брег.

Искрцувањето се одвиваше на пет главни плажи, а најжестоки борби се водеа на плажата Омаха Бич и во близина на градот Кан, каде што германската одбрана беше особено силна.

Почеток на крајот за нацистичка Германија

И покрај големите загуби, сојузниците до крајот на денот успеаја да обезбедат мостобрани на францускиот брег и да создадат услови за префрлање на повеќе од милион војници во Европа во следните недели. Операцијата „Оверлорд“ официјално заврши во август 1944 година, кога беа ослободени бројни француски градови, вклучувајќи го и Париз на 25 август.

Во исто време, советските сили напредуваа од исток, ставајќи ја Германија под притисок на два фронта.

Историско наследство на Денот Д

Воените историчари често го сметаат Денот Д за пресвртница која го забрза падот на Третиот рајх. По успешното искрцување во Нормандија, стана јасно дека поразот на нацистичка Германија е само прашање на време. Германија капитулираше во мај 1945 година, со што заврши војната во Европа, додека конечниот крај на Втората светска војна дојде неколку месеци подоцна по капитулацијата на Јапонија.