Новата инженерска заедница Cyborg Code Syndicate, фокусирана на вештачка интелигенција, софтверско инженерство и open-source иновации, го одржа своето прво претставување пред ИТ заедницата во Скопје.
Настанот, насловен „Engineering the AI-Driven Future“, се одржа во „Лабораториум“, а на него присуствуваа околу 100 искусни професионалци од ИТ секторот, меѓу кои архитекти, tech leads, AI инженери и експерти од повеќе компании.
Иако станува збор за приватен настан, темата што ја отвори заедницата има пошироко значење: вештачката интелигенција веќе не е далечна технологија резервирана само за глобалните компании, туку станува дел од секојдневната работа, бизнисот и инженерството.
Основачот Виктор Сушелски посочи дека целта на Cyborg Code Syndicate е да помогне локалниот и глобалниот пазар полесно да ја разберат AI трансформацијата, да останат во чекор со трендовите и попрактично да ја користат технологијата во секојдневната работа.
„Сакаме да го подигнеме нивото на знаење на пазарот и да помогнеме AI да се користи попрактично и поефикасно. Но истовремено сакаме и да создадеме нешто големо од овој регион – модерни и корисни решенија што ќе имаат глобална вредност“, изјави Сушелски.
Заедницата се позиционира како иницијатива што делува од Македонија, но со интернационален поглед и амбиција. Нејзиниот фокус не е само следење на AI трендовите, туку нивна практична примена преку решенија што се одржливи, применливи и релевантни за реални проблеми.
На настанот беа претставени и проектите ROA и Pandora, како дел од пошироката визија за модерно софтверско инженерство во ерата на вештачката интелигенција. Заедницата најавува дека веќе развива сопствени софтверски решенија наменети за ИТ компании и искусни професионалци.
Со првиот настан во Скопје, Cyborg Code Syndicate испрати порака дека Македонија не треба само да ја следи AI револуцијата, туку и активно да учествува во нејзиното создавање.
