Вкупно 14 пожари на отворен простор се регистрирани денеска низ државата до 20 часот, информира Центарот за управување со кризи.

Од нив, два пожари сѐ уште се активни.

Едниот е во близина на стадионот во Кичево, каде што гори стрниште и сува трева. Вториот активен пожар е на територијата на Битола, кај тунелот на обиколницата.

Останатите пожари се изгаснати. Интервенции имало во повеќе општини, меѓу кои Дебар, Дебарца, Демир Капија, Ѓорче Петров, Новаци, Прилеп, Пробиштип, Свети Николе, Кочани и Куманово.

Два пожари биле регистрирани и на подрачјето на општина Центар — еден на булеварот „Македонија“, а друг на улицата „Тодор Александров“.

Претходно беше информирано дека пожарот во демиркаписко Прждево зафатил три постари куќи, а од опасност била спасена една повозрасна жена.