„Црно злато“, по текст на Дејан Дуковски и во режија на Слободан Унковски, премиерно ќе биде изведена на 27 ноември во 20 часот во Македонскиот народен театар. Претпремиерата е закажана еден ден претходно, на 26 ноември.

Актерската екипа ја сочинуваат Јовица Михајловски, Мими Таневска, Камка Тоциновски, Нела Павловска, Григор Јовановски, Сашко Коцев, Софиа Насевска-Трифуновска и Гораст Цветковски.

За сценографијата е задолжен Бранко Хојник, костимограф е Александар Ношпал, а музиката е на Златко Ориѓански. Во авторскиот тим се и Звездана Ангеловска како асистентка на режисерот, Мартин Манев како асистент на сценографот и Никола Булески како асистент на костимографот.

„Црно злато“ на репертоарот и во декември

По премиерата, публиката ќе може да ја погледне претставата и на 1, 4 и 29 декември, со почеток во 20 часот. Овие термини се дел од објавениот есенско-зимски репертоар на МНТ. skopjeinfo.mk

Текстот на Дуковски ја имаше својата праизведба во март годинава во Београдско драмско позориште, во режија на Оливер Фрљиќ. Скопската публика сега ќе ја види неговата поставка во режија на Унковски.

За Унковски ова е враќање во МНТ по „Сите сме птици“, која ја постави во 2022 година според драмскиот текст на Важди Муавад.