Срцевите и мозочните удари ретко доаѓаат без предупредување. Голема меѓународна студија, која опфатила повеќе од девет милиони возрасни лица од САД и Јужна Кореја, покажала дека речиси сите сериозни кардиоваскуларни настани се поврзани со четири добро познати фактори на ризик. Станува збор за висок крвен притисок, покачен холестерол, зголемено ниво на шеќер во крвта и пушење. Истражувачите утврдиле дека овие фактори претходеле на дури 99 проценти од срцевите и мозочните удари забележани во студијата.

Најчесто присутен ризик бил високиот крвен притисок. Повеќе од 93 проценти од лицата кои подоцна доживеале срцев удар, мозочен удар или срцева слабост претходно имале дијагностицирана хипертензија.

„Овие резултати многу убедливо покажуваат дека изложеноста на еден или повеќе ризик-фактори е присутна кај речиси сите кардиоваскуларни заболувања“, изјавил кардиологот Филип Гренланд, водечки автор на истражувањето.

Научниците сметаат дека поголем фокус треба да се стави на контролата на факторите што можат да се променат, наместо на ризици врз кои луѓето имаат малку влијание. Дополнителни истражувања покажуваат дека причините за срцев удар можат да се разликуваат меѓу мажите и жените. Кај жените, значителен дел од случаите не биле предизвикани од класично затнување на артериите, туку од други состојби како нарушена рамнотежа во снабдувањето на срцето со кислород, спонтани оштетувања на коронарните артерии или крвни згрутчувања.

Експертите предупредуваат дека редовното мерење на крвниот притисок, контролата на холестеролот и шеќерот во крвта, како и откажувањето од пушењето, остануваат меѓу најефикасните начини за намалување на ризикот од срцев и мозочен удар.