Италијанската премиерка Џорџа Мелони и нејзината данска колешка Мете Фредериксен упатија заеднички апел за запирање на неконтролираната илегална миграција во Европа. Тие бараат итно воспоставување центри во трети земји надвор од Европската Унија, каде што ќе се депортираат сите одбиени баратели на азил. Оваа иницијатива повторно ја отвори дебатата за европската политика за азил.

Иако доаѓаат од сосема различни политички опции, Мелони ја предводи десничарската партија Браќа на Италија, додека Фредериксен е социјалдемократка, двете лидерки истакнаа дека ги поврзува заедничката цел да ја заштитат Европа. Фредериксен преку порака на Инстаграм нагласи дека илегалната имиграција носи сериозни последици по европските општества, вклучувајќи го порастот на криминалот и притисокот врз јавните служби.

Двете премиерки бараат итни и иновативни решенија, со посебен фокус врз мигрантските центри во трети земји каде што лицата кои немаат право на престој ќе чекаат враќање во матичните држави. Притисокот од Рим и Копенхаген доаѓа во момент кога прашањето за управување со надворешните граници на Унијата е под постојана контроверзија меѓу сите членки.