Царинската управа информираше дека во серија одвоени акции се запленети половина милион евра во готовина, 25 илјади парчиња лекови и медицински инструменти, додека паралелно се води и истрага за случај поврзан со 80 килограми марихуана. Деталите ги соопштил директорот на Царинската управа Бобан Николовски во гостување на емисијата „Топ тема“. 

Најголемата акција била реализирана на граничниот премин Табановце, каде царинските службеници откриле 500.000 евра скриени во специјално конструиран бункер во минибус. Парите биле спакувани во 14 проѕирни ќеси. 

Според информациите, минибусот патувал од Германија кон Албанија, а во него имало седум албански државјани. Цариниците прво забележале сомнителни преправки на возилото, по што било ангажирано царинско куче и извршено скенирање на минибусот, со што бил потврден сомнежот. 

Николовски изјавил дека станува збор за најголема заплена на девизи во историјата на Царинската управа. Парите и возилото биле трајно одземени, а против возачот, албански државјанин со иницијали Џ. Г., веќе била донесена судска пресуда од Основниот суд во Куманово. 

Освен оваа акција, царинските служби заплениле и 25 илјади парчиња лекови и медицински инструменти. Во тек е и истрага за случај со 80 килограми марихуана, која е отворена по информации добиени од царинското разузнавање. 

Директорот на Царината соопштил дека Одделението за истраги годинава поднело 71 кривична пријава и дека се работи и на поширока истрага поврзана со акцизна стока. Според него, клучна улога во откривањето на ваквите случаи има координацијата меѓу Царината, полицијата и обвинителството.