Битола од 24 до 27 јуни ќе биде центар на музиката, уметноста, младинската култура и граѓанскиот активизам со јубилејното 25. издание на фестивалот „Битола Отворен Град“. Фестивалот, кој низ годините прерасна од локална иницијатива во една од најпрепознатливите културни платформи во Македонија, годинава ќе се одвива на повеќе локации низ градот, вклучувајќи ги Широк Сокак, Старата битолска чаршија, кафулињата и јавните простори, кои повторно ќе бидат претворени во отворени сцени.

Организаторите порачуваат дека „некои градови имаат фестивал – овој фестивал има град“, нагласувајќи ја идејата за урбана култура што ја оживува целата Битола.

Годинашната програма носи концерти, диџеј-сетови, изложби, работилници, јавни дискусии, волонтерски акции и берза на винили. Меѓу главните музички имиња се Суперхикс, словенечката група Lelee, како и регионални изведувачи како Osmi Dan и други бендови и диџеи од регионот.

Фестивалот започнува на 24 јуни со прес-конференција и изложба „Ела поблиску“, по што следуваат музички настапи и диџеј-програми во различни делови од градот. Во следните денови ќе се одржат работилници за музика и финансиска писменост, јавна дискусија за ментално здравје, како и концерти на отворени сцени. Главната концертна вечер е закажана за 26 јуни на Широк Сокак, а последниот ден од фестивалот ќе биде посветен на берза на винили и завршен концерт во Скејт-паркот.

Организатор е Младинскиот културен центар – Битола, со поддршка од Општина Битола и партнери од културниот и приватниот сектор. Сите настани се бесплатни и отворени за јавноста, со што фестивалот и оваа година ја потврдува својата улога како еден од клучните урбани културни настани во земјата.