Новиот британски премиер Енди Бернам го претстави составот на својот кабинет и најави почеток на серија економски и социјални реформи насочени кон подобрување на животниот стандард во Велика Британија.

За министер за финансии е именуван поранешниот министер за одбрана Џон Хили, кој порача дека негов приоритет ќе биде изградбата на посилна економија и подобрување на животниот стандард на британските граѓани.

Министерството за надворешни работи ќе го предводи Ед Милибанд, кој ја наследува Ивет Купер. Тој изјави дека му претставува „животна чест“ да ја води британската дипломатија и најави силна поддршка за демократијата, владеењето на правото и меѓународната соработка.

Шабана Махмуд останува на функцијата министерка за внатрешни работи, при што најави продолжување на реформите во имиграцискиот систем и дополнително зајакнување на безбедноста.

Бернам истакна дека неговата влада веднаш ќе почне со мерки за намалување на трошоците за живот, а до крајот на годината ќе биде претставен и нов десетгодишен план за развој на земјата.

Покрај економските мерки, премиерот најави реформи во образованието, поголема поддршка за менталното здравје на младите и изградба на повеќе јавни станови.

„Велика Британија мора повторно да ја врати стабилноста и довербата, како дома така и на меѓународната сцена“, порача Бернам, додавајќи дека целта на новата влада е создавање посилна економија и подобри услови за живот за сите граѓани.