Производството на моделите А1 и Кју2 постепено завршува, а нивната замена ќе биде нов компактен електричен модел.
Ауди ја донесе одлуката да ги укине двата свои најпристапни модели, А1 и Кју2. Одлуката со месеци се најавуваше, а сега официјално стапува на сила.
Производството на моделот Кју2 ќе заврши во Инголштат во април оваа година. Овој модел беше претставен во 2016 година, а во Германија почна да се продава по цена од околу 29.000 евра, што го правеше значително поевтин од моделот Кју3.
Во текот на деценијата беа продадени 887.231 примерок од Кју2, но во последните години побарувачката опадна. Последните достапни примероци се нудат по споменатата цена за верзијата со бензински мотор од 116 коњски сили.
Слична судбина го очекува и моделот А1. Производството на овој градски автомобил постепено се гаси во шпанскиот Марторел.
А1 беше претставен во 2010 година и низ две генерации достигна 1.389.658 продадени примероци. Последната верзија почна да се продава од околу 22.950 евра и се нудеше во изведбите Спортбек и Олстрит.
Двата модели ќе бидат заменети со новиот А2 е-трон, компактен електричен модел што треба да пристигне оваа есен. Тој ќе се базира на платформата МЕБ плус, истата што ја користи и Фолксваген ИД.3 Нео.
Се очекуваат батерии со капацитет од 58 и 79 киловат-часови и досег до 630 километри според ВЛТП циклусот.
Покрај намалувањето на понудата, Ауди најавува и нов електричен спортски модел, кој треба да влезе во производство во 2027 година. Ќе се произведува во погонот Болингер Хофе, специјализиран за мали серии.
Автомобилот беше најавен со концептот „Ауди Концепт Ц“ и треба да биде одговор на модели како Порше 718 Бокстер и Кајман. Станува збор за двосед со отстранлив тврд покрив, минималистичка внатрешност и нов дизајнерски израз.
