Пазарната вредност на Епл во вторникот за кратко надмина 5 билиони долари, откако акциите достигнаа сесиски максимум од 342,89 долари. Со тоа компанијата стана втора во историјата што ја поминува оваа граница, по Nvidia, која прва ја достигна.

На затворањето на трговскиот ден, акциите на Епл пораснаа 0,72 отсто, на 339,33 долари, со што пазарната вредност изнесуваше 4,98 билиони долари. Во текот на сесијата, при цена од 342,89 долари, вредноста на компанијата за кратко достигна 5,036 билиони долари.

Епл го презеде тронот на најскапа компанија во светот претходно овој месец, откако ја престигна Nvidia. Производителот на чипови беше највредна компанија почнувајќи од јуни 2025 година и прва ја надмина границата од 5 билиони долари. Акциите на Nvidia во вторникот пораснаа 0,53 отсто, на 197,63 долари, со вкупна вредност од 4,78 билиони долари.

Растот на побарувачката за производите на Епл, како и одлуката компанијата да не учествува во тековната трка за инвестиции во вештачка интелигенција меѓу големите технолошки компании, придонесоа за резултатот. Акциите на Епл оваа година пораснаа околу 25 отсто. Тоа е повеќе од другите членки на групата „Величествена седмица“ Nvidia, Meta, Alphabet и Microsoft. За новите услуги, вклучувајќи ја обновената верзија на Siri, Епл користи технологија за вештачка интелигенција на Google, со што ги избегнува големите трошоци за инфраструктура поврзани со инвестициите во податочни центри.

Одлуката на Епл да ги задржи цените на iPhone непроменети минатиот месец, кога ги зголеми цените на MacBook и iPad, дополнително придонесе за побарувачката. Според аналитичари, купувачите го набавувале телефонот пред очекуваните покачувања на цените подоцна оваа година.