Технолошкиот гигант „Амазон“ обезбеди нов заем од 17,5 милијарди долари од конзорциум на големи светски банки, само неколку дена откако преку продажба на обврзници собра дополнителни 14 милијарди долари. Така, за помалку од два дена компанијата обезбеди нов капитал во вредност од вкупно 31,5 милијарди долари.

Иако официјално средствата ќе се користат за „општи корпоративни потреби“, аналитичарите сметаат дека најголемиот дел од парите се наменети за развој на инфраструктура за вештачка интелигенција. Меѓу банките кои стојат зад заемот се „Ситигруп“, „Џеј-Пи Морган Чејс“, „Велс Фарго“, „Ејч-Ес-Би-Си“ и „Бенк оф Америка Секјуритис“.

Извршниот директор на „Амазон“, Енди Џеси, неодамна изјави дека компанијата никогаш не видела технологија која се развива толку брзо како вештачката интелигенција. Компанијата планира во текот на 2026 година да инвестира околу 200 милијарди долари во нови дата-центри, специјализирани чипови и облачна инфраструктура преку платформата „Амазон Веб Сервисис“, која претставува еден од најголемите светски провајдери на облачни услуги.

Покрај тоа, „Амазон“ веќе инвестираше 10 милијарди долари во американската компанија за вештачка интелигенција „Антропик“, со можност инвестицијата дополнително да се зголеми. Трката за доминација во вештачката интелигенција ги принудува и другите технолошки компании агресивно да инвестираат. „Алфабет“, матичната компанија на „Гугл“, планира да обезбеди околу 80 милијарди долари за нови инвестиции во оваа област, додека „Мета“ најави издавање обврзници во вредност од 30 милијарди долари.

Според проценките на аналитичарите, четирите најголеми технолошки компании – „Амазон“, „Гугл“, „Мајкрософт“ и „Мета“ – годинава би можеле заедно да потрошат речиси 600 милијарди долари за развој на инфраструктура поврзана со вештачката интелигенција.