Поладен атмосферски фронт кој се спушта од северозапад преку Алпскиот регион ќе влијае на временската состојба во Македонија, носејќи дестабилизација на атмосферата во периодот од четврток до сабота.
Во овој период се очекува променливо облачно време со повремени врнежи од дожд со различен интензитет. Локално врнежите ќе бидат пообилни, особено во петок и сабота, кога се очекува да наврнат над 20 литри дожд на квадратен метар.
На одделни места атмосферата ќе биде нестабилна со пороен дожд, грмежи, засилен ветер и услови за локално невреме проследено со електрични празнења и појава на град.
И во Скопје и околината се очекува променливо облачно време со повремени врнежи од дожд. Во делови од котлината постои можност за нестабилност со пороен дожд, грмежи и засилен ветер.
Во петок температурите ќе бидат пониски и ќе се движат меѓу 14 и 20 степени, што ќе донесе краткотрајно освежување. Сепак, веќе за време на викендот следува ново затоплување, при што температурите повторно значително ќе пораснат. Во централните и југоисточните делови на Македонија тие ќе достигнат до околу 30 степени, враќајќи летни услови по кратката нестабилна фаза.
