Асоцијацијата за е-трговија на Македонија (АЕТМ) утре ќе го започне циклусот активности во пресрет на 9. Регионална конференција за е-трговија 2026, која годинава ќе се одржи на 3 ноември во Националната опера и балет во Скопје.

Првиот E-commerce Meetup, што ќе се одржи во Casa Bar, ќе биде посветен на една од најактуелните теми во дигиталниот маркетинг – влијанието на инфлуенсер маркетингот врз продажбата, градењето на брендот и довербата кај потрошувачите.

Во фокусот на панел-дискусијата ќе биде прашањето дали инфлуенсер маркетингот навистина генерира продажба или неговата најголема вредност лежи во зголемувањето на препознатливоста на брендот, создавањето доверба и воспоставувањето долгорочни односи со потрошувачите.

Настанот ќе отвори дискусија и за тоа како компаниите ги избираат инфлуенсерите со кои соработуваат, кои критериуми се користат за мерење на успешноста на кампањите, со какви предизвици најчесто се соочуваат брендовите и креаторите на содржина, како и кои практики носат најдобри резултати.

На панелот ќе учествуваат Дијана Илиевска, Campaign Manager во Ananas.mk, Александра Стојановиќ, Marketing Manager во Fashion Group Macedonia, Драгана Ѓоќиќ, Head of Strategic Marketing во Korpa.mk, како и инфлуенсерот Стефан Спирковски. Модератор на дискусијата ќе биде Димитар Атанасовски, ко-основач на Idea Lab.

Од АЕТМ информираат дека учеството на настанот е бесплатно, но заинтересираните треба претходно да се пријават поради ограничениот број места.

Со овој настан, АЕТМ го најавува почетокот на серијата активности што ќе кулминираат со Регионалната конференција за е-трговија, која традиционално ги собира претставниците на компаниите, дигиталните експерти, маркетинг професионалците и претприемачите од регионот.